Bünyadov Teymur. Anam birdi Vətən tək... Bakı, Səda, 2004.

20 yanvar dəhşətindən sonra yaman günə qaldım, sındım, sarsıldım. Çarəsiz, kimsəsiz, dəli-divanələr tək öz-özümlə danışdım. Dağlardan uçmaq, çöllərə qaçmaq, dəryalarda qərq olmaq, dünyayla, vidalaşmaq istədim. Nagahan bayatılarım sinəmdə bulaq tək qaynadı, coşdu-çağladı. 1995-ci ildə "Öpərdim gözlərindən”, 1998-ci ildə "Bilsəydim ayrılıqdı", 2000-ci ildə "Gül açılır, yaz olur" adlı bayatılar kitablarım işıq üzü gördü, "şair"oldum. Laylalarım, bal oxşamalarım eldən-elə, əldən-ələ düşdü. Xeyli zaman keçdi, bayatılarımı ciddi nəzərdən keçirdim, saf-çürük etdim, seçdim, saydım. Bəyəndiklərimi saxladım, çoxlu, yeni, təzə-tər ba- yatılar əlavə etdim. İki cildlik bayatılarımla yenidən Sizlərin görüşünə gəldim.