Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) “MEK Könüllülük proqramı”na yeni qəbul olunan gənclərlə görüş keçirilib. MEK-in direktoru, texnika elmləri doktoru Hüseyn Hüseynov Azərbaycanda könüllülük hərəkatının xüsusilə son illərdə dövlət dəstəyi və gənclərin fəallığı sayəsində sürətlə genişləndiyini, cəmiyyətin ayrılmaz hissəsinə çevrildiyini vurğulayıb. Direktor könüllülük fəaliyyətinin Azərbaycan gənclərinin potensialının üzə çıxarılması, şəxsi inkişafı və sosial məsuliyyətinin artırılması baxımından böyük imkanlar yaratdığını qeyd edib. H.Hüseynov bildirib ki, “MEK Könüllülük proqramı” artıq dördüncü dəfədir həyata keçirilir. “Bu layihə gənclərin bilik və bacarıqlarının inkişafı ilə yanaşı, onların kitabxana işi və elmi informasiya resursları ilə yaxından tanış olmalarına imkan yaradır. Builki qəbul üçün 300-dən artıq müraciət daxil olub. Seçim mərhələsinin nəticələrinə əsasən, 20 nəfər könüllü proqrama cəlb ediləcək”, – deyə direktor bildirib. Əvvəlki könüllülük proqramlarının nəticələrindən də söz açan H.Hüseynov qeyd edib ki, proqram iştirakçılarından 3 nəfər hazırda MEK-də, 15-dən çox könüllü isə müxtəlif kitabxana və digər müvafiq müəssisələrdə çalışır. Direktor çıxışının sonunda gəncləri yaradılan imkanlardan səmərəli istifadə etməyə, elmi informasiya resursları ilə işləmək bacarıqlarını inkişaf etdirməyə və proqram çərçivəsində təqdim olunan imkanlardan maksimum yararlanmağa çağırıb. Tədbirdə MEK-in Rəqəmsallaşma, innovasiya və elektron xidmətlər üzrə direktor müavini, tarix üzrə fəlsəfə doktoru Oruc Quliyev yeni könüllülərə uğurlar arzulayıb. O.Quliyev gənclərin kitabxananın fəaliyyətinə cəlb olunmasının onların nəzəri biliklərini praktiki təcrübə ilə zənginləşdirməsi, eləcə də müxtəlif peşəkar bacarıqlar əldə etməsi baxımından əhəmiyyətini vurğulayıb. Daha sonra MEK-in elmi katibi, “MEK Könüllüləri” proqramına məsul Şəbnəm Rüstəmova çıxış edərək “MEK Könüllüləri” fəaliyyətinin 2024-cü ildən etibarən AMEA sistemi üzrə ilk könüllülük proqramı olduğunu diqqətə çatdırıb. Elmi katib bildirib ki, proqram iştirakçıları MEK-in müxtəlif struktur bölmələrinin fəaliyyətinə cəlb olunaraq kitabxana işi ilə bağlı praktiki bilik və bacarıqlar əldə edirlər. Bununla yanaşı, könüllülər MEK tərəfindən təşkil olunan müxtəlif tədbir və layihələrdə iştirak etməklə təşkilati, kommunikasiya və komanda ilə işləmək bacarıqlarını inkişaf etdirmək imkanı qazanırlar. Görüş dəyirmi masa ətrafında davam etdirilib. Könüllü namizədlərin bilik və bacarıqları, eləcə də proqrama uyğunluqları müsahibə mərhələsində qiymətləndirilib, onları maraqlandıran suallara aydınlıq gətirilib.